యాషెస్ టెస్టు సిరీస్లో మరో ఉత్కంఠభరితమైన రోజు నమోదైంది. మ్యాచ్ వేగం ఏమాత్రం తగ్గకుండా కొనసాగుతున్న ఈ కీలక పోరులో అలెక్స్ కేరీ అద్భుతమైన సెంచరీతో ఆస్ట్రేలియాను నిలబెట్టాడు. ఒత్తిడి పరిస్థితుల్లో వచ్చిన ఈ శతకం ఆసీస్ ఇన్నింగ్స్కు ప్రాణం పోసింది.
ప్రారంభంలో కీలక వికెట్లు కోల్పోయి కష్టాల్లో పడిన ఆస్ట్రేలియాకు కేరీ బ్యాట్తో అండగా నిలిచి 106 పరుగులు సాధించాడు. ఇంగ్లాండ్ బౌలర్ల కట్టుదిట్టమైన దాడిని ధీటుగా ఎదుర్కొంటూ, ఓపికతో పాటు దూకుడును సమతుల్యంగా చూపించాడు. రక్షణతో పాటు అవసరమైన వేళ బౌండరీలు బాదుతూ స్కోర్ను ముందుకు నడిపించాడు.
యాషెస్ సిరీస్ ప్రత్యేకతే అదే – ఇక్కడ ఏ సెషన్ కూడా నెమ్మదిగా సాగదు. ప్రతి ఓవర్లోనూ పోరాటం కనిపిస్తుంది. కేరీ సెంచరీ కూడా అదే వేగాన్ని ప్రతిబింబించింది. ఒకవైపు ఇంగ్లాండ్ బౌలింగ్లో తీవ్రత కొనసాగుతుండగా, మరోవైపు కేరీ ఆత్మవిశ్వాసంతో బ్యాట్ను నడిపాడు.
ఈ శతకం ఆస్ట్రేలియా స్కోర్బోర్డుకు మాత్రమే కాదు, జట్టుకు మానసికంగా కూడా పెద్ద బలం. లోయర్ ఆర్డర్లో నిలబడి ఇన్నింగ్స్ను చక్కదిద్దడం యాషెస్ లాంటి సిరీస్లో ఎంతో కీలకం. కేరీ ఇన్నింగ్స్తో పాటు ఖవాజా కూడా 82 పరుగులతో స్కోర్ బోర్డుని నిలబెట్టారు.
ఇద్దరి సమయోచితంగా ఆటతో ఆస్ట్రేలియా మొదటిరోజు ముగిసేవరకు 326 పరుగులు చేసి ఎనిమిది వికెట్లు కోల్పోయి మంచి స్థితి లోనే ఉంది.
మొత్తంగా చెప్పాలంటే, యాషెస్లో గేర్ తగ్గడం అనేదే లేదు. ప్రతి రోజు కొత్త హీరో, కొత్త మలుపు. ఈసారి ఆ బాధ్యతను అలెక్స్ కేరీ తన సెంచరీతో తీసుకున్నాడు. రాబోయే రోజుల్లో మ్యాచ్ మరింత ఉత్కంఠగా మారే అవకాశాలు స్పష్టంగా కనిపిస్తున్నాయి.
